ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានលើកឡើងថា ក្ដីពឹងរបស់ក្រុមប្រឆាំងដែលចង់យកទឹកដីថៃដើម្បីប្រឆាំងនឹងរាជរដ្ឋាភិបាលកម្ពុជាបានរលាយហើយក្រោយពីលោក Pita មិនអាចក្លាយជានាយករដ្ឋមន្ត្រីថៃ។ 

សម្ដេចនាយករដ្ឋមន្ត្រីបានសរសេរនៅលើតេឡេក្រាមរបស់សម្ដេចនៅយប់ថ្ងៃទី១៣ ខែកក្កដា ឆ្នាំ២០២៣ នេះថា ការមិនទទួលបានសំឡេងគ្រប់គ្រាន់ដើម្បីធ្វើជានាយករដ្ឋមន្រ្តីថៃរបស់លោក Pita គឺជាការបរាជ័យដ៏ធំរបស់ក្រុមពួកប្រឆាំងនៅកម្ពុជា ព្រោះពួកគេតែងចិញ្ចឹមចិត្តក្នុងការប្រើប្រាស់ទឹកដីរបស់ថៃ ដើម្បីធ្វើចលនាប្រឆាំងបះបោរនឹងរាជរដ្ឋាភិបាលកម្ពុជា។ 

សម្ដេចថា៖ «នេះមិនមែនបង្ហាញថាខ្ញុំជ្រៀតជ្រែកកិច្ចការផ្ទៃក្នុងរបស់ថៃនោះទេ ខ្ញុំគ្រាន់តែចង់បង្ហាញថា ព្រោះកន្លងមកពួកក្បត់ជាតិទាំងនេះ តែងតែរំពឹងទុកថានៅពេលលោក Pita ក្លាយជានាយករដ្ឋមន្រ្តីរបស់ថៃ ពួកគេនឹងប្រើប្រាស់ទឹកដីរបស់ថៃ ដើម្បីធ្វើចលនាប្រឆាំងបះបោរនឹងរាជរដ្ឋាភិបាលកម្ពុជា ឥឡូវនេះក្តីរំពឹងរបស់ពួកអាតិរច្ឆានទាំងនោះបានរលាយដូចអំបិលត្រូវទឹកហើយ»។

សម្ដេចបានផ្ដាំថាសូមកុំធ្វើនយោបាយផ្អែកលើដង្ហើមអ្នកដទៃ ដែលនេះជាការដាស់តឿន និងជាបំណងល្អរបស់សម្ដេចសម្រាប់ក្រុមជ្រុលនិយម៕